السسلام عليكم ورحمة الله وبركاته
كيفكم ..؟

و عليكم السلام و الرحمة


حقيقة الموضوع روعة و اعجبني و بحكم اني مجنون ألعاب كمبيوتر

طبعا عندي PS3 و xbox360 و كلها تقريبا نفس الشئ في الدقة و جودة صورة اللعبة و كذا

لكن طبعا فيه أشرطة حصرية على البلايستيشن و اشرطة ثانية حصرية على الإكس بوكس

لكن بكل صراحة البلايستيشن فيه ميزة ان اللعب فيه عن طريق الإنترنت مجاني


عموما هذي نبذة بسيطة ,, بالنسبة للأشرطة الي ألعبها في PS3 حاليا و الأشرطة الي سبق و لعبتها

و بذكر شئ انه اي شريط ما فيه أون لاين هذا على طول بعد ما اختمه ارجع لنفس المحل و ابيعه

و هذي هي الألعاب



uncharted 2 : اللعبة حصرية على البلايستيشن فقط و حاليا موجود عندي و ختمتها زمان

و الله رووعة رووعة رووعة تقييمها في أحد المواقع الأجنبية 9.5 من 10 و بالنسبة لي اشوفه يستاهل 10 من 10

لعبتها عن طريق الأون لاين مجنونة خصوصا انه تقدر تلعب طور القصة و معك أحد أصدقائك أو غيرهم من المتواجدين

فيها عدة ألعاب عن طريق الأون لاين مثل البحث عن الكنز و قتل الفريق الآخر خلال وقت معين و غيرها كثير







call of duty modern warfare 2 : حاليا موجودة عندي و ختمتها زمان

اللعبة غنية عن التعريف بكل صراحة و تقييمها في أحد المواقع الأجنبية 9 من 10

قصة اللعبة و تاثيراتها روعة خصوصا في أحد المراحل

يوم طاح صاروخ قريب من مكانك وبدت الطيارات تطيح من السماء و انت تركض جهة بيت تحتمي فيه

و لا في نهاية اللعبة يوم تسحب السكين من جسمك و تتغير الشاشة و الألوان و اخيرا تحذفها على الزعيم الأخير

تقدر تلعبها عن طريق الأون لاين و دائما يكون فيها تحديات و فله و من اول واحد يقنص و يكون عنده سرعة استجابة و كذا

مشكلة اللعبة انها تحتاج لسرعة اتصال و اضف إلى ذلك انه سيرفراتها اغلب الأحيان تعلق لأن عدد الي يلعبونها في اليوم الواحد بالملايين

اللعبة مرة مرة روعة و خيآل و آكشن , حاليا واصل البرستيج الثاني الرتبة 33 عن طريق النت





demon's souls : حصرية على البلايستيشن موجوده عندي حاليا

اللعبة تقييمها في أحد المواقع الأجنبية 9 من 10

لعبة حلوة صعبة ترفع الضغط تختبر الصبر عندك تحبها تكرهها في نفس الوقت

قبل امس ختمت اللعبة تحديدا <-- اخيرا

و الله هاللعبة اني درستها دراسة مو لعبتها بس لأنها مليانة ألغاز و أدوات و تطويرات

طبعا ما قدرت اختمها إلا بمساعدة أصدقاء عن طريق الأون لاين و بعد ما رحت لويكي الألعاب و مواقع ثانية ابحث عن الحلول

ميزة اللعبة انه تقدر تستدعي أحد أصدقاءك لعالمك حتى يساعدك في قتل الشياطين و كذا

و غير كذا تقدر تكتب مسجات على الأرض يقراها اي واحد يلعب اللعبة عن طريق الأون لاين و يقدر يقيمها

اذا قيمها يعطونك زيادة روح HP او سحر MP و تبقى رسالتك موجودة لفترة اطول

و تقدر بعد تدخل بالقوة لعالم شخص آخر و تقتله و كذا

لكن حط بالك ان كل شئ تسويه يكون له عواقب ممكن انها تسهل عليك اللعبة او تصعبها بناءا على قرارك




هذي 3 من الألعاب و لي عودة ان شاء الله

حاليا تعبت و انا اكتب و افكر وش اكتب او كيف اختصر

لأنه بكل صراحة بعض الألعاب لو اكتب عشر ردود عنها يمكن ما خلصت


لي عودة ان شاء الله

بآإكوو




borderlands : موجودة عندي ختمتها زمان

اللعبة تقييمها في أحد المواقع الأجنبية 8 و بالنسبة لي اشوفها تستاهل 8

هي حلوة لكن ينقصها كثير مثل اللقطات لأنها مرة قليلة او تكاد تكون معدومة

اول ما تبدأ اللعبة تختار بين 3 اولاد و بنوته يعني 4 اشخاص , كل واحد له قدرته الخاصة

انا مختار القناص و قدرته يرسل صقر يهجم على الأعداء

طبعا فيه تطويرات كثير و عدد الأسلحة فوق 3 مليون لكن اشكالها مثل بعض الي تختلف الأرقام فقط

لعبتها عن طريق النت حلوة كثير و يقدر ينضم لعالمك 3 غيرك و تلعبون القصة و المهمات







ninja gaiden segma 2 : موجودة عندي لكن باقي ما ختمتها

اللعبة تقييمها 8.5 و بالنسبة لي اشوفها تستاهل هالتقييم

اللعبة صعبة شوي و تعتمد على السيوف و الأسهم و السحر و غيره

تلعب بأربع شخصيات 3 بنات و ولد واحد لكن الشخصية الأساسية الولد و اغلب المهمات هو الي يلعبها

و البنات لكل وحده منهم مهمة واحدة و لكل شخصية سلاح معين

لعبته عن طريق النت حلوة لكن صعبة شوي تحتاج تطور نفسك قبل ماتلعب عن طريق النت






uncharted : الجزء الأول مو موجودة عندي لأني بعتها و ختمتها زمان

حلووة كثير و هي تحكي عن بداية قصة اللعبة الشهيرة unchrted 2 اول ما تعرف البطل على الصحفية

لعبتها عن طريق النت صراحة ما جبرتها لأني كنت ابي اختمها بأسرع وقت عشان ألعب الجزء الثاني و كان لازم اعرف القصة قبل



لي رجعة ان شاء الله